اسكريبت كامل بقلم إيمان شلبي
يعني ايه
يعني سنه ونتخرج
تقدر تقولي انت ناوي تعمل ايه بعد التخرج
رد باستهزاء
هشتغل اكيد يعني
وياتري هتشتغل ايه؟
هز أكتافه ببرود
معرفش
وليه متشتغلش من دلوقتي
مفيش شغل
دورت وملقتش؟
علي يدك دورت كتير
لا يا نديم انت جاتلك فرص شغل وانت رفضتها
لانها مش مناسبه ليا
ضحكت بسخريه فبصلي بغيظ
انتي بتضحكي علي ايه
عليك طبعاً
جز علي اسنانه وهو بيهبد علي التربيزه
ليه بقول نُكت؟
لا بس علي يدي أن انت مش شخص مسؤول
رد بعصبيه
ايه الكلام ده ما تراعي الفاظك!
بص يا نديم أنا هقول الكلمتين اللي عندي ولو عايز تزعل ازعل بس بجد كلمتين محشورين في زوري من زمان
انا كل مره بفضل افخم وأعظم فيك كنوع من أنواع التشجيع ولاني بعتبرك زي اخويا مع انك لو فكرت ثانيه هتلاقيك شخص بلا قيمه
اه يانديم متبصليش كده انت فعلا شخص بلا قيمه
تقدر تقولي إنجاز واحد عملته في حياتك
انت متخيل الشباب اللي في سنك بيعملوا ايه؟
ولا ازاي هتتخيل صح
انت مش فاضي
كفايه عليك البنات اللي بتجري وراهم واللي بتعشم فيهم وتسيبهم وقت ما تزهق!
انت جاتلك مليون فرصه
وجاتلك مليون شغلانه
بس بغبائك ضيعتهم
مره متروحش انترفيو علشان خارج مع واحده
مره واحده تقولك الشغل ده مش مناسب ليا ولا لمستوايا فتقرر متروحش علشان ترضيها مع انك في الآخر سيبتها!
مره تشتغل يوم ومتروحش تاني علشان المكان مفهوش تكييف
مره ترفض شغل علشان هتصحي بدري ياحرام كان هيطلعلك هالات سودا تحت عيونك
بالذمه مش مكسوف من نفسك وانت لسه لحد دلوقتي بتاخد المصروف من اهلك؟
فوق يانديم
كفايه عك وفوق لنفسك شويه
اجتهد واتعب
علي الاقل علشان متحسش بالفشل
علشان تحس ان ليك قيمه
خلصت كلام وبصتله
كان بيسمعني بملامح خاليه من اي تعبير
انا اسفه يا نديم بس انت غالي عندي وكان نفسي اقولك الكلمتين دول يمكن افوقك.
اخدت شنطتي والفون وقومت من مكاني
اتمني تفكر في كلامي كويس عن اذنك
فات يومين
متكلمناش
وقتها عرفت أنه زعلان!
حاولت اكلمه
الفون كان مقفول
بعتله ماسدجات كتير مشافهاش
عملي بلوكات من كل مكان
ده حتي الكورس مبقاش يحضره
نفسيتي تعبت
كنت بعيط طول اليوم وحاسه بالذنب
بلوم نفسي اني وصلته المرحله دي
انا كان قصدي افوقه مش يبعد عني
انا فعلا حبيت نديم
بالرغم من كل الغلط اللي بيعمله
فات شهر
معرفش عنه حاجه
اختفي نهائياً
كنت بصلي قيام ليل
وبدعي من كل قلبي
اشوفه ونتكلم زي زمان
حتي لو فضلنا أصحاب
انا راضيه
المهم يبقي معايا!
وفي يوم
كنت منعزله في اوضتي كالعاده
سمعت صوت ماسدج
فتحتها واول ما شوفتها اتصدمت
عامله ايه يا هانيا
رديت وعيوني بتلمع بالدموع
اخيرا ظهرت!
طمنيني عليكي
بعتله فويس وانا بعيط بقهره
مش كويسه يا نديم
مش كويسه ابداً
من غيرك
انا اسف
انا اللي اسفه
انا اللي زعلتك وجرحت مشاعرك
بالعكس انتي فوقتيني يا هانيا
انا بسببك اتغيرت كتير اوي
نزلت شغل
اشتغلت مدرس انجلش
بعدت عن البنات اللي كنت بكلمهم
بقيت مُلتزم
بصلي الفرض بفرضه
اصبحت راجل مسؤول ويعتمد عليه
اتحولت من شخص بلا قيمه لشخص مجتهد وشاطر في مجاله وكل ده بسببك
مكنتش قادره اصدق اللي شيفاه
معقوله؟
معقوله نديم اكتر شخص كان فاشل في نظري
اتغير وأصبح شخص ليه قيمه وكل ده بسببي انا
هانيا انا كنت عايز اقولك علي حاجه
اتفضل
انا بحبك وعايز اتقدملك
اتنفضت من مكاني بذهول وصدمه
بصيت علي الشاشه ودموعي نازله لكن المره دي دموع فرحه
أخيراً ربنا استجاب لدعوتي
أخيراً هرتاح
اخيراً صراع قلبي وعقلي هينتهي
وأخيراً هبقي مع الشخص اللي بحبه
لكن للاسف مش كل اللي بنتمناه وبيتحقق خير لينا!
فوقت من ذكرياتي وشرودي علي صوت الفون بتاعي بيرن
كان نديم
اخدت نفس عميق ورديت
الو
عامله ايه
كويسه وانت
الحمد لله
سكت
مكنتش عارفه اقول ايه
نفسي اتكلم
نفسي اعاتبه
لكن خايفه
خايفه اخسره
مش هقدر
مش هستحمل يبعد عني
طب ايه هتفضلي ساكته كتير
هزيت اكتافي بهدوء
عايزني اقول ايه
ولا حاجه يا هانيا انا هنام
نديم استني
نعم!
بلعت ريقي وانا بغمض عيوني وبضغط عليها
وسكت شويه
رد بملل
اخلصي يا هانيا هتتكلمي ولا اقفل
نديم انا مش عايزه اكمل
قولتها بسرعه وانا بفتح عيوني وبتنفس بسرعه رهيبه
سكت لحظه
وانا كمان قولت كلامي وسكت
كان الصمت هو سيد المكان
بعدها بشويه رد بذهول
انتي قولتي ايه
قولت مش عايزه اكمل يا نديم
انا مش هقبل اكمل مع واحد بيساومني اصلح عيب فيا أو يسيبني ،مش هقبل طول الوقت اعيش مُهدده وخايفه منك ،انا مش عايزه الحُب ده ،الحُب المشروط!
اللي بيحب حد بيحبه بدون شروط
انت محبتنيش
ولا عمرك هتحبني
انت بتحب اهتمامي بيك
خوفي عليك
انا طول الوقت بقدم مشاعر ومش بلاقي منك مقابل
لا بتسمعني ولا بتقدر تعبي ولا بتهتم بمشاعري
طول الوقت انا اللي بسمع وانا اللي بقدم مشاعر وانا اللي بهتم بكل تفاصيل حياتك
علي ايه بجد؟
انت مين
فيك مميزات ايه
لو ناسي افكرك يا نديم
انت بسببي انا بقيت نديم ممدوح المدرس المشهور
لولا كلامي ولولا أني فوقتك كنت هتفضل في مكانك
جاي دلوقتي بعد ما بقي ليك قيمه تساومني
جاي تقارني بشويه طُلاب من طلابك وتقولي انا بشوف بنات اشكال والوان وعيني غصب عني بتبصلهم!
طب ما تبصلهم ياحبيبي
اقولك علي حاجه
روح اخطبلك واحده منهم
صغيره وحلوه اهي تنفعك
مش انا اللي اتهدد
انت مهما لفيت مش هتلاقي زي من الأساس
بكره تيجي تاخد دهبك ونفضها سيره
خليني اشم نفسي من العلاقه المُقرفه دي
قفلت في وشه السكه وانهارت علي اقرب كُرسي قابلني
مكنتش عارفه انا جايبه الثبات والجراءه دي كلها منين في الحقيقه!
مش عارفه انا ازاي قولت كده
ازاي بطلب منه منكملش وانا روحي معاه
ازاي هقدر استحمل يوم من غيره
حتي لو مبنتكلمش
حتي لو اهتمامه قل
وحتي لو بطل يحبني
لكنه كان موجود وده كفايه
بعد مرور أسبوع
انتي كويسه؟
سألتني ماما وهي بتبصلي بنظرات كلها قلق
اخدت نفس عميق وانا بسند ظهري علي الكنبه
مش عارفه
بتحبيه؟
بحبه بس الحُب مش كفايه
كان ممكن يتغير يا هانيا ليه اتسرعتي
ماما افهمي نديم مش بيحبني
وخطبك ليه طالما مش بيحبك؟
هزيت اكتافي بجهل وحيره
معرفش ...بقولك ايه لو سمحتي كفايه كلام في الموضوع ده ربنا اكيد شايلي الخير
ربنا يعوضك خير يارب ياحبيبتي
يالا بقي انا هدخل أنام عشان عندي بكره شغل بدري تصبحي علي خير.
دخلت اوضتي
قفلت الباب بالمفتاح
قفلت نور الأوضه
قعدت علي السرير في الضلمه
وكالعادة سمحت لدموعي تتحرر
مسكت الفون
فتحت البروفايل بتاعه
طلعت الصور
كان حاطط صوره جديده
حطيت ايدي فوق قلبي وانا بتنهد بوجع واشتياق
فتحت الكومنتات
كانت كلها بنات
وهو بيرد
بالرغم انها مش من عادته
عمره ما رد علي بنت في الكومنتات
بس يمكن عمل كده علشان يغيظني!
رميت الفون وبدأت اعيط بحرقه وغيره
وفي بالي عمرو حسن وهو بيقول
ادخلي بروفايله ف اخر اليوم
دوّري ف جديده وأخباره
ركِّزي ف كلامه وف هزاره
وادخلي للبنت اللي بتعمل لايكات وقلوب
فتِّشي عندها علي أي دليل للي مابينهم
فُكِك من دول واطلعي منهم
ناسياه ازاي وانتي يوماتي بجد متابعاه
ومنين بتقولي لصحباتك انا مش عاوزاه !
اذا كنتي بجد بقالك فترة مابتشوفيهوش
ده مايمنعشي ان انتي لحد الان حبّاه
فيه نُص بتاع نغز كرامتك مابقاش طايقه
أما النص اللي بتاع قلبك ف ده لسه معاه
هانيا مش بتفكري تشتغلي؟
قالتها واحده صاحبتي وهي قاعده معايا في الكليه
رفعت حاجبي باستغراب
انا بشتغل فعلاً
ايوه بس مُدرسه حضانه مش بتفكري تطوري من نفسك يعني
ازاي يعني
يعني تتخصصي في ماده وتبقي مُدرسه
ايوه يا رغد انا بحب الانجلش جدا بس الموضوع ده صعب اوي هجيب طُلاب منين!
متقلقيش سيبي الموضوع ده عليا
هتعملي ايه
كان في صاحب سنتر كلمني علشان اشتغل معاه وطلب مني اصطاف مدرسين انا قولتله عندي اصحابي كتير قولت نبدا الخطوه سوا وربنا يكرمنا
هكلمه عليكي تدي انجلش والبت نهال صاحبتنا رياضه وانا عربي
بالفعل
