اسكريبت كامل بقلم إيمان شلبي

اسكريبت بقلمي إيمان شلبي 
بس انا بحبك!
الحُب مش كفايه 
عايزني اعمل ايه علشان اثبتلك
تظبطي جسمك 
حاولت كتير صدقني حاولت لكن مقدرتش
وانا مش قادر اتقبل شكلك كده ،انا مُدرس وكل يوم بيعدي عليا بنات اشكال والوان عيني غصب عني بتبصلهم لانك مش مكفياني انا حاسس ان في حاجات كتيره اوي ناقصه في علاقتنا لو متغيرتش هتكون علاقه مُستحيله!
عيوني لمعت بالدموع وانا بهز راسي بأستسلام
حاضر هروح لدكتور يا نديم وهتخن شويه
سند ظهره علي الكُرسي واخد بوق قهوه ببرود 
اتمني وعلي فكره دي آخر فُرصه ليكي معايا في خلال شهر لو جسمك مظبتهوش اعتبري كل شيئ انتهي
سكتت لحظه ،مكنتش عارفه ارد اقول ايه ،خطيبي بيخيرني بين اني اتخن شويه واظبط جسمي أو علاقتنا تنتهي ،كان صعب اخد قرار ،البعُد والأستسلام او المحاولة للمره اللي معرفش عددها كام اني اتخن!
مكنتش قادره افهم نفسي انا ليه متقبله منه المُعامله القاسيه ديه ، ليه بعدي وبتهاون وبسامح علي حساب كرامتي
ملقتش اجابه غير اني بحبه 
صحيح هي مش اجابه مُرضيه ولا مُبرر قوي لتنازل اي شخص عن كرامته وقلبه ونفسه لكن انا فعلاً بحبه
كل مره كُنت بقعد فيها مع نفسي بسأل كام سؤال احاول ابرر بيهم قوه تحمُلي وتنازلاتي 
بحبُه؟
أه انا معرفتش الحب غير لما قابلته 
مقدرش ابعد عنه؟
برضو أه انا لو بعدت عنه حياتي تُقف من اساسه 
مستعده أضحي وادوس علي قلبي؟
مُستعده بكامل إرادتي
وكأن قلبي اتخلق علشان يحبه هو وبس!
وعقلي ،عقلي دايما بلغيه بأستيكه 
وبلغي كل قوانينه اللي بتقول أن الكرامه اهم من الحُب
يالا نمشي انا زهقت
فوقت من شرودي علي صوته 
رفعت عيوني بصتله والدموع بتلمع جواها
مهتمش!
مسحتها بكبرياء وقومت من مكاني من غير ما انطق حرف ،حط الحساب وشاورلي بنفس ملامح البرود واللامبالاة
خرجنا من الكافيه ،مشينا خطوتين من غير ما حد يوجه كلامه للتاني فضلنا ماشيين فتره مش قُليله لحد ما لقيت نفسي قُدام بيت اهلي
ياه هو انا للدرجادي محسيتش بالطريق!
انا همشي
اخدت نفس عميق ووقفت قدامه ورديت بهدوء 
مش هتطلع تقعد معايا شويه 
لا 
قالها بكل اختصار وبرود وقسوه لدرجه احرجتني
رديت بنبره كلها دموع 
لا ليه 
نفخ بضيق وبص في ساعه موبايله
عندي مُقابله مع صاحب سنتر مش فاضي
هزيت راسي بأبتسامة باهته 
تمام ربنا يوفقك 
سلام
كان لسه هيمشي مسكت أيده وسألته بنبره مهزوزه
ه هو انت لسه بتحبني؟؟
شد أيده بعصبيه 
حقيقي مش وقته الكلام الفارغ ده انتي فاضيه بصراحه سلام
قال كلامه وسابني ومشي
بصيت حوليا بتوتر وأحراج ملقتش حد واقف 
حمدت ربنا وطلعت اجري علي بيتي وانا مش شايفه قدامي من كُتر الدموع اللي اتجمعت في عيوني
بليل كنت واقفه في البلكونه 
في ايدي فنجان قهوه 
بستعيد الذكريات
بفتكر اول يوم قابلته 
كان أجمل يوم واتعس يوم في نفس اللحظه!
كُنت في أولي جامعه ،بكل اسف وقعت في ماده وقررت ادخل فيها summer cours،اخدت فيها cours كان معايا بنت وولدين، وقتها شوفته
كان داخل متأخر ،وباين عليه الإرهاق والتعب
انا اسف يادكتور علي التأخير والله كان عندي شُغل
وقتها الدُكتور سمحله يدخل وكمل شرح 
من وقت ما شوفته وانا بحاول افتكر أنا شوفته فين قبل كده!
ملامحه مش غريبه عليا 
فضلت يمكن اكتر من نص ساعه بحاول افتكر 
وأخيراً افتكرت 
انا حلمت بيه 
ايوه حلمت بيه من قبل ما اشوفه من حوالي سنه بالتقريب
هانيا سرحانه ليه؟
ا احم اسفه يادكتور
هز رأسه بأبتسامه وكمل شرح وهو بيكتب علي البورد
بصتله بطرف عيوني كان قاعد مركز لكن في الفون مش الشرح!
كان فاتح الواتساب وبيكلم حد وهو مُبتسم
وقتها معرفش ليه قلبي نهشته الغيره
فجأه لف رأسه وبصلي شافني مركزه معاه
وشي احمر ،قلبي دق بتوتر ،عيوني فضلت تبص في كل مكان إلا عيونه
خلص ال وطلعت اجري وانا لسه متوتره ومحروجه أنه شافني ببصله
يقول عليا ايه دلوقتي
بنت مش مُحترمه!
روحت البيت وانا طول اليوم بفكر فيه 
معرفش ليه هو بالذات 
عدي عليا شباب اشكال والوان 
يمكن اجمل منه بمراحل 
لكن معرفش ليه هو بالذات اللي شغل بالي وتفكيري وكأن قلبي كان حاسس ان في علاقه هتجمعنا سواء صداقه أو حُب
فات يوم ورا الثاني ورا الثالث وانا بحضر ال وكل يوم بشوفه وكل يوم بتعلق بوجوده اكتر والحُب جوايا بيكبر غصب عني ،لدرجه مكنتش عايزه ال يخلص يمكن كنت عايزاه يطول اكتر واكتر علشان اشوفه كل ثانيه وكل دقيقه 
حبيته
امتي وازاي وليه هو بالذات 
مكانش عندي اجابه
لكن كُل املي يحس بيا وبمشاعري 
وفي يوم لظروف خارجة عن إرادتي مروحتش 
كان يوم تعيس بالنسبالي حقيقي
فضلت مكتئبه طول اليوم 
معنديش رغبه اعمل اي حاجه
كنت فارده ظهري علي السرير وبقلب في الواتس بملل لقيت رقم غريب باعتلي ماسدج!
هانيا ازيك
فتحتها بأستغراب وبصيت علي صوره البروفايل ملقتش
رديت وقتها وأنا جوايا فضول اعرف مين اللي باعتلي ماسدج في وقت زي ده
الساعه اتنين بليل!
الحمد لله 
مين؟
كان فاتح الشات لقيته بيكتب قومت اتعدلت في قعدتي وقلبي وقتها دق بأحساس غريب
انا نديم اللي معاكي في الكورس
اتنفضت من مكاني 
مكنتش مصدقه اللي عيني شيفاه 
معقوله 
نديم باعتلي ماسدج
فضلت شويه استوعب لقيته بيكتب مره تانيه فضلت اراقب الشاشه بفضول وقلب بيدق بسعادة
انا اسف اني بتكلم في وقت متأخر زي ده بس انا لسه واصل من الشغل والله ،هو انتي كويسه
بلعت ريقي وكتبت بأيد بتترعش
ولا يهمك انا كويسه وانت؟
بخير 
لقيتك مجتيش النهارده الكورس قولت اتطمن 
الحمد لله انك بخير
رديت بأبتسامه مهزوزه
شكراً يا نديم علي سؤالك انا بس كنت تعبانه شويه النهارده
الف سلامه عليكي شفاكي الله وعفاكي يارب 
الله يسلمك من كل شر 
انا معايا فويس الشرح بتاع النهارده لو تحبي ابعتلك 
بجد ياريت معلش لو هتعبك معايا 
مفيش تعب ولا حاجه تحت امرك
شكراً بجد 
العفو علي ايه
بعتلي الفويس بعدها سألني عن الكُليه وعني وعن اصحابي وأهلي وكل تفاصيل حياتي وانا بجاوب بكل سلاسة واستسلام ورساله تجيب الثانيه تجيب الثالثه لحد ما استأذن أنه يقفل علشان ينام قفلت انا كمان وانا حاسه بالتعب بصيت علي الساعه لقيت نفسي بكلمه من حوالي تلت ساعات بالتقريب!
ياخبر عدي تلت ساعات وانا مش حاسه بالوقت 
بس تعرفوا كانوا اجمل تلت ساعات في عُمري
ومن اليوم ده مبطلناش كلام 
اتحولت علاقتنا من اتنين ميعرفوش حاجه عن بعض لأقرب اتنين لبعض!
خلصنا الامتحانات ونجحنا 
كُنا بنذاكر سوا 
ونحضر الكورس سوا
بيشاركني تفاصيل يومه 
وانا كذلك
كان دايماً يقولي احنا اصحاب وبس 
اوعي تتعشمي يا هانيا 
اوعي تحبيني في يوم!
كان دايماً عنده احباط 
شايف نفسه 
قليل 
فاشل 
مش قد المسؤوليه
اما عني 
طول الوقت بشجعه واطمنه 
يمكن انا الوحيده اللي كنت محسساه بقيمته
كان يجي يحكيلي أنه ارتبط 
وبعد يومين بالعدد يقولي أنه فركش!!!
حياته كانت كلها استهتار 
بنات ،سهر، خروجات
اوقات كان يغيب باليومين والتلاته 
وقتها اعرف أنه مشغول مع بنت جديده 
او بمعني اصح بيعشم بنت جديده!
كنت أنا استبن في حياته 
وقت ما يبقي محبط ،مخنوق 
محتاج دافع 
او كلمتين يحسسوه أنه محور الكون 
كنت انا الحيطه المايله
لحد ما في يوم كُنا قاعدين مع بعض في الكافيه بتاعنا 
كنت سرحانه 
مخنوقه 
عيوني بتلمع بالدموع
بصلي بأستغراب وهو بيسألني
مالك
اخدت نفس عميق وانا ببصله ببرود
مفيش 
لا فيه مالك
شبكت ايدي الاتنين في بعض وسكت لحظه 
ضم حواجبه في بعض وقال
لااااا دي مش طبيعتك في أيه حد مزعلك ؟
رديت بسرعه وتلقائيه
انت
رد بذهول
انا ليه بس انا عملت ايه؟
كل حاجه بتعملها غلط يا ندم
مش فاهم قصدك!
لا انت فاهم كويس اوي 
نديم احنا داخلين رابعه جامعه 
عارف